Parlamenti shqiptar miratoi të enjten vendimin për ngritjen e komisionit hetimor për veprimtarinë e tij. Kërkesa ishte paraqitur më parë nga Partia Socialiste, ndërkaq si rrallë herë, mori edhe shumicën e votave të deputetëve të Partisë Demokratike. Propozimi i socialistëve u miratua me 116 vota pro, 1 kundër dhe 4 abstenime.Komisioni hetimor do të veprojë për një afat tre-mujor dhe do të ketë në përbërje të tij gjithsej 11 anëtarë. Mazhoranca qeverisëse do të ketë shumicën, ndërsa opozita do të ketë kryesimin e këtij komisioni.
Bazuar në argumentimin e kërkesës së depozituar nga PS, hetimi do të shtrihet në të gjithë veprimtarinë e parlamentit duke filluar që nga shërbimi për deputetët deri te votimi në seancat plenare.
"Hetimi i funksionimit të stafit ndihmës së Kuvendit, puna që ata kryejnë dhe shpërndarja e punës në komisione, zbatimi i kërkesave ligjore për respektimin e procedurave në shqyrtimin e projektligjeve, emërimet e Kuvendit në institucionet dhe entet në varësi të tij, si dhe hetimi i integritetit dhe eficiensës së sistemit të votimit elektronik të Kuvendit”, thuhet ndër të tjera në kërkesën e depozituar nga socialistët. /Telegrafi/